नेपाल संवत् ११४७ या न्हूदँया दिनय् नेवाः देय् दबू जामाच्व नगर समितिया ग्वसालय् तःजिक भिंतुना ज्याझ्वः नापं सांस्कृतिक ज्याझ्वः जूगु दु । उगु ज्याझ्वलं नेवाः संस्कृति, म्हसीका नापं सभ्यतायात संरक्षण यायेमाःगु खँय् बः बिउगु दु ।
कात्तिक २४ गते नागार्जुन नगरपालिका–५ स्थित हरसिद्धि देगः लागा सितपाइलय् जूगु उगु भिंतुना कालबिल नापं सांस्कृतिक ज्याझ्वलय् नागार्जुन नगरपालिकाया थीथी लागायापिं द्वलंद्वः स्थानीयवासीया ब्वति दुगु खः ।
नगर दुनेया थीथी गुथि, संस्कृतिप्रेमिपिं ब्वति कया मोटरसाइकल, साइकल, गाडी सहित बाजागाजा थाना र्याली याना हरिसिद्धि देगः लागाय् थ्यनेवं छगू औचापरिक समरोहर याना भिंतुना कालबिल व सांस्कृतिक ब्वज्या याःगु खः ।
ज्याझ्वलय् ऊर्जा, जलस्रोत तथा सिँचाइमन्त्री विराजभक्त श्रेष्ठ विशेष अतिथि नापं वरिष्ठ कलाकार मदनकृष्ण श्रेष्ठ मूपाहाँ जुयादीगु खः । बागमती प्रदेशसभा सदस्यपिं, नागार्जुन नगरपालिकाया कार्यवाहक प्रमुख सुशीला अधिकारी, नगर प्रवक्ता महेश रिमाल, थीथी वडाया नायःपिं नापं नेवाः देय् दबूया केन्द्रीय मूछ्याजे श्रीकृष्ण महर्जन, स्वनिगः विशेष प्रदेश समितिया न्वकू गंगादेवी महर्जन, येँ जिल्लाया नायः धनबहादुर महर्जन तिमिला नापं थीथी लागायापिं न्ह्यलुवापिन्सं नं ब्वति कयादीगु खः ।
ज्याझ्वलय् मूपाहाँ ख्याली जुजु मदनकृष्ण श्रेष्ठयात हनेज्या याःगु खः । अथे हे नगर प्रवक्ता महेश रिमाल, वडा नं. २ का नायः थुमबहादुर केसी र वडा नं. ३ का नायः उमेश लामायात नं हनापौ लःल्हाःगु खः ।
ज्याझ्वलय् नेवाः देय् दबू केन्द्रीय समितिया मूछ्याञ्जे श्रीकृष्ण महर्जनं केन्द्रीय सरकारं हे स्थानीय सरकारयात नेपाल संवत्यात छ्यलेगु नितिं परिपत्र याये धुंकूगु अवस्थाय् नागार्जुन नगरय् कर्यान्वयनया अवस्था छु दु धकाः अध्ययन यायेत देय् दबूया सम्वन्धित पालिकाया नेतृत्वयात इनाप यानादिसें नागार्जुन नगरपालिकां थःगु साइनबोर्डय् नेपालभाषा व रञ्जना लिपां जामाच्व नगरपालिका धकाः तयेगु नितिं नगरपालिकायात ध्यानाकर्षण यानादिल ।
नेवाः देय् दबू जामाच्व नगर समितिया न्वकू विश्वराम बलामीं लसकुस न्वचू तयादीगु खःसा ज्याझ्वःया सभानायः नापं समितिया नायः अजित पुतवारं सुभाय् देछासें ज्याझ्वः क्वचायेकादीगु खः ।