ने.सं. ११४७ कछलाथ्व पारु कुन्हु नेवा: देय् दबू, बूढानीलकण्ठ नगर समितिया ग्वसालय् नेपाल संवत् ११४७ या लसताय् जूगु मोटरसाइकल र्याली बूढानीलकण्ठ-२, नगरस्तरीय तरकारी बजारं नगरप्रमुख, उपप्रमुख लिसें थकाली भाजु मोतिलाल श्रेष्ठं नेवाः परम्पराकथं सिन्हः, कोखा व सगं बियाः न्ह्याकादीगु खः । उगु र्याली लामिछाने टोल, सुन्दरटार, करुणा पुल, स्पेसल चोक, हात्तिगौंडा वडा ७ ज्याकुथि पान्चोक, हात्तिगौंडा चोक, गणेश चोक जुयाः बूढानीलकण्ठ द्यः चाःहिलाः पञ्चकन्या लँपु जुयाः बूढानीलकण्ठ-२, गणेश देगः चुकय् (वासिकु) थ्यंकाः भिंतुना ज्याझ्वलय् हिउगु खः ।
उगु ज्याझ्वलय् भिंतुना कालबिल, जेष्ठ नागरिक हनेज्या, थीथी ख्यलय् ताःलाःपिं व योगदान बियादीपिं वासिकुया व्यक्तित्वपिन्त हनेज्या, फुटसल, ब्याडमिन्टन, खिपः सालेगु कासाय् न्हाप व लिउ लाःपिं कासामियात सिरपाः लःल्हायेगु लिसें सांस्कृतिक ज्याझ्वः यानाः ज्याझ्वः क्वचाःगु खः ।
नेवा: देय् दबू, बूढानीलकण्ठ नगर समितिया नायः भाजु श्यामकाजी श्रेष्ठया सभापतित्वय् जूगु उगु ज्याझ्वलय् मूपाहाँ नेवा: देय् दबूया संरक्षक भाजु नरेश कुमार ताम्रकार, विशेष पाहाँ नगर प्रमुख मिठाराम अधिकारी, विशेष पाहाँ उपप्रमुख मय्जु अनिता लामा, पाहाँकथं नेवा: देय् दबूया केन्द्रीय पार्षद भाजु प्रदिप डंगोल, नेवा: देय् दबू स्वनिगः विशेष प्रदेश समितिया दुजः लिसें बूढानीलकण्ठ नगर समितिया संरक्षक ब्रम्हदेव श्रेष्ठ, नेवा: देय् दबू येँ जिल्ला समितिया दुजः राजकाजी श्रेष्ठ, वागमती प्रदेश सभाया पुलांम्ह माननीय भीमसेन खत्री, बूढानीलकण्ठ नगर कार्यपालिकाया न्वकू लिसें वडा नं. १२ या नायः नवराज भट्टराई, बूढानीलकण्ठ सांस्कृतिक प्रतिष्ठानया दुजः राजु तुलाधर, न्हूदँ ११४७ भिंतुना समारोह समितिया कजि आशालाल श्रेष्ठ, बूढानीलकण्ठ-२ या वडा नायः राजेन्द्र श्रेष्ठ, बूढानीलकण्ठ-७ या वडा नायः बसनारायण महर्जन, वडा-६ या वडा नायः रवी खड्का, समाजसेवी सानुकान्छा श्रेष्ठ, बूढानीलकण्ठ-२ या वडा दुजःपिं रामविनोद लामिछाने व पार्वती श्रेष्ठ, वडा-३ या दुजः बालमाया श्रेष्ठ, वडा-६ या दुजः मुना महर्जन, वासिकु नेवा: पुच:या नायः विकास श्रेष्ठ, भुइज:सी नेवा: पुच:या नायः हरिश्चन्द्र श्रेष्ठ, अजिमा ल्याय्म्ह पुच:या नायः कृष्ण श्रेष्ठ, तक्स्वाँ नेवा: पुच:या नायः गंगालाल महर्जन, चपली नेवा: पुच:या नायः डा. कृष्णमान जोशी, कार्यविनायक नेवा: पुच:या नायः लक्ष्मी श्रेष्ठ, सम्यक स्कूलया प्रिन्सिपल पूर्ण श्रेष्ठ नापं बूढानीलकण्ठ नगर दुनेया थीथी थासं बाजं थानाः सलंसः मनूतय्गु भव्य ब्वति दुगु खः ।
नेवा: देय् दबू बूढानीलकण्ठ नगर समितिया छ्याञ्जे अनिता डंगोलं न्ह्याकादीगु उगु ज्याझ्वलय् सभापति श्यामकाजी श्रेष्ठं लसकुस न्वचु, पाहाँपिं राजेन्द्र श्रेष्ठ, ब्रम्हदेव श्रेष्ठ, विशेष पाहाँ उपप्रमुख अनिता लामा, विशेष पाहाँ प्रमुख मिठाराम अधिकारी व मूपाहाँ नरेशकुमार ताम्रकारं भिंतुना न्वचु बियादीगु खःसा कजि आशालाल श्रेष्ठं सुभाय् देछानादीगु खः । ज्याझ्वःया निगूगु ब्वय् वासिकु नेवा: पुच:, भुइज:सी नेवा: पुच:, अजिमा ल्याय्म्ह पुच:या कलाकारपिन्सं प्याखं न्ह्यब्वयादीगु खः । भाषा, कला, संस्कृति व सम्पदाया संरक्षण व प्रवर्द्धनया निंतिं लिसें नेपाःया मौलिक राष्ट्रिय संवत् छ्यलाबुलाय् हयेत विशेष ग्वाहालि जुइगु भलसा कयातःगु उगु ज्याझ्वःया निंतिं बूढानीलकण्ठ नगरपालिका वडा नं. २ पाखें नगरपालिकां आर्थिक ग्वाहालि याःगु खः ।
