नेवाःतय्गु मंकाःगु राष्ट्रिय संगठन नेवाः देय् दबू यल जिल्ला समिति व नेवाः मिसा दबू यलया मंकाः ग्वसालय् २२ गते आइतवाः जूगु नेपाल संवत् ११४७ न्हूदँ क्यनीगु लसताय् जूगु ज्याझ्वलय् नेपाल संवत्यात आः नेपाःया नोटय् अर्थात ध्यबाय् नं दुथ्याकेमाःगु नापं आः राज्यं नेपाःया संवत् सम्वन्धि कानुन दयेकेमाःगु माग याःगु दु ।
नेपालभाषा मंकाः खलः यलया ज्याकू त्यागलय् जूगु न्हूदँया ज्याझ्वलय् नेवाः देय् दबूया केन्द्रिय मूछ्याञ्जे श्रीकृष्ण महर्जन नेवाः विशेष पाहायाा थासं न्वंवानादीगु इलय् उगु कथंया माग यानादीगु खः । वय्कल नेपाल संवत्या न्हूदँ ११४७ क्यनीगु दिनय् तकया दुने नं नेपाःया ध्यबाय् नेपाल संवत् तयेगु घोषणा सरकारं मयात धाःसा अनं लिपा अभियान हे न्ह्याकेत तयार दुगु खँ कनादिसें वय्कलं नेपालय् आः तक नं संवत् सम्वन्धि कानुन मदुनिगु जुयाः कानुन दयेके बिइगु नितिं नेवाः देय् दबूया नापं सकल नेवाःतय्गु खलः पुचः जाना न्ह्याः वनेत तयार जुइमाः धयादिल । अथे हे मूछ्याञ्जें स्वन्ति व न्हूदँया इलय् नेवाः देय् दबूया स्वनिगः विशेष प्रदेश, स्वनिगःया जिल्ला समिति नापं सम्वन्धित पालिका समितिइ सहलह ब्याका नेपाल संवत्यात स्थानीय सरकार नापं राज्यया थीथी निकायसं गुलि तक छ्यालाच्वंगु दु, या छु दु धैगु अवस्थायात कया अनुगमन याना केन्द्रीय समितियात प्रतिवेदन लःल्हनादीत इनाप यानादिसें अनं लिपा नेपाल संवत् कार्यान्वयया बारे देय् दबूपाखें थःगु ज्याझ्वःत दयेका वनेगु जुइ धकाः धयादिल ।
नेवाः देय् दबू यल जिल्लाया नायः कृष्णभक्त डंगोलया सभापतित्वय् जूगु उगु ज्याझ्वलय् नेवाः देय् दबूया केन्द्रिय सल्लाहकार डा. पुष्पराज राजकर्णीकारं थौंया इलय् नेवाःतसें नं नेपाल संवत्यात मदिक्क छ्यला वनेमाःगु नापं नेपालभाषायात नं ब्यवहारय् लागू याना वनेमाःगु खँय् बः बियादिल । अथे हे नेवाः देय् दबू स्वनिगः विशेष प्रदेशया नायः नविन थेच्वमिं नेपाल संवत्या महत्वयात कनादिसें नेपाल संवत्यात लागू यायेगु व याकेगु नापं नेपालभाषायात नं छ्यला यंकेमाः धकाः धयादिल ।
ज्याझ्वलय् मूपाहाँ यल महानगरपालिका वडा नं. ७ या वडा नायः कुलबहादुर महर्जनं थःम्हं वडाय् नेपाल संवत्यात लागू याना वयाच्वनागु दु धयादिसें नेपाल संवत् व नेपालभाषा नापं नेवाः ज्याझ्वःया नितिं न्ह्याबलें नेवाःत नाप नापं हे थःगु वडा ज्याकू दुगु खँ कनादिल । नेवाः देय् दबू येँ जिल्लाया नायः धनबहादुर महर्जन तिमिला, नेवाः देय् दबू यल जिल्लाया पुलांम्ह नायः नापं नेपालभाषा मंकाः खलः यलया पुलांम्ह नायः हेराकाजि महर्जन लगायतपिन्सं उगु ज्याझ्वलय् नेपाल संवत् ११४७ न्हूदँया लसताय् भिंतुना देछानादीगु खः ।
नेवाः देय् दबू यल जिल्ला समितिया छ्याञ्जे बुद्धिलक्ष्मी महर्जनं न्ह्याकादीगु उगु ज्याझ्वलय् यलया थीथी नेवाः समाजया प्रतिनिधि नापं थीथी ख्यःया ब्यक्तित्वपिनिगु उपस्थिति दुगु खःसा नेवाः मिसा दबू यल जिल्ला छ्याञ्जे सरला कर्माचार्यं लसकुस न्वचू बियादीगु खःसा नेवाः देय् दबू यल जिल्लाया दांभरी अमिर राज महर्जनं सुभाय् न्वचू बियादीगु खः ।