नेवाःतय्गु मंकाःगु राष्ट्रिय संगठन नेवाः देय् दबूया ग्वसालय् देय् दबूया हे केन्द्रीय ज्याकू भचातगिं चःमति येँय् नेपाल संवत ११४७ या न्हूदँया लसताय् भिंतुना कालबिल नापं देय् दबूया लसता पौ पितब्वज्या जूगु दु । नेपाल संवत ११४६ कौलागा त्रयोदशी शनिवाः कार्तिक २१ गते नेवाः देय् दबूया केन्द्रीय नायः रश्मिला प्रजापतिया नायःसुइ बागमती प्रदेशया मुख्य मन्त्री किरण थापामगरया मूपाहाँसुइ जूगु खः ।
मूपाहाँ मुख्यमन्त्री थामामगरं सुकुन्दाय् मत च्याकाः नापं नेपाल संवतया प्रवर्तक शंखधर साख्वाःया किपातय् स्वांमाः क्वखाय्काः ज्याझ्वःया उलेज्या यानादीगु खः । ज्याझ्वलय् लसकुस न्वचू तयादिसें देय् दबूया केन्द्रीय नायः नापं ज्याझ्वःया नायः रश्मिला प्रजापतिं नेवाः देय् दबू धैगु नेवाःतय्गु मंकाःगु राष्ट्रिय संगठन खः धयादिसें नेवाःतय्गु प्रतिनिधित्व याइगु संस्था खः धयादिल । अथे हे वय्कलं बागमती प्रदेशय् नेपालभाषा व तामाङ भाषायात सरकारी कामकाजी भाषाया रुपय् मान्यता बिइ धुंकाः आः यायेमाःगु ज्याया नितिं बागमती प्रदेश सरकारलिसे जानाः नेवाः देय् दबू न्ह्याः वनेत तयार दुगु खँ कनादिल ।
मूपाहाँ मुख्यमन्त्री थापामगर, संरक्षकपिं नरेश कुमार ताम्राकार, पवित्र बज्राचार्य, सल्लाहकार नापं संघीय संसद कुलभक्त शाक्य व देय् दबूया नायः रश्मिला प्रजापतिं लसता पौ मंकाः कथं पितब्वज्या यानादीगु खः । नेवाः देय् दबू स्वीनिदँ क्यंगु नापं मोहनी नखः, स्वन्ति नखः व नेपाल संवत् ११४७ न्हूदँया लसताय् उगु लसता पौ पिथंगु खः । न्हूगु ज्यासना पुचः वये धुंकाः खुलाया दुने थ्व न्हापांगु लसता पौ पिथंगु खः ।
ज्याझ्वलय् नेवाः देय् दबूया संरक्षकपिं नरेश कुमार ताम्रकार, पवित्र बज्राचार्य, देय् दबूया सल्लाहकार नापं संघीय सांसद कुलभक्त शाक्य, हलिं नेवाः दबू केन्द्रया कार्यवाहाक नायः समिर महर्जनं नेपाल संवत्या महत्व, स्वन्ति नखःलिसें नेवाःतय्सं यायेमाःगु ज्या व नेवाः देय् दबूपाखें नेवाःतय्गु नितिं माःगु कथं ज्या याना वने फयेमाः धकाः कामनायासें नेपाल संवत् ११४७ न्हूदँ व स्वन्ति नखःया लसताय् भिंतुना देछायादीगु खः । ज्याझ्वलय् लःल्हायेगु ल्यंदनिगु मनोनित पौ सल्लाहकारपिं प्राज्ञ प्रतिसरा साय्मि, सुरकृष्ण बैद्य व निरञ्जनरत्न शाक्यपिन्त मूपाहाँ बागमती प्रदेशया मुख्यमन्त्री किरण थापामगरं लःल्हानादीगु खः ।
ज्याझ्वलय् सल्लाहकारपिं डा. पुष्पराज राजकर्णीकार, डा. मुक्ति प्रधान, लोककवि राजभाई जकःमि अथे नेवाः देय् दबूया केन्द्रीय पदाधिकारी नापं केन्द्रीय दुजःपिं, स्वनिगः विशेष प्रदेशया पदाधिकारी, नेवाः देय् दबूया विषयगत समितिया नेतृत्वपिं, जातीय समाजया प्रतिनिधिपिं, देय् दबूया येँ, यल व ख्वप जिल्लाया पदाधिकारी नापं स्वनिगःया थीथी पालिकाया नेतृत्व यानादीपिनिगु नं ब्वति दुगु खः ।
नेवाः देय् दबूया मूछ्याञ्जे श्रीकृष्ण महर्जन नेवाः ज्याझ्वः न्ह्याकामि जुयादीगु उगु ज्याझ्वलय् देय् दबूया बरिष्ठ न्वकू सत्यनारायण डंगोलं सुभाय् न्वचू बियादीगु खः ।
