नेवाः देय् दबूया सल्लाहकार चन्द्रलाल राजभण्डारीप्रति श्रद्धाञ्जली ज्याझ्वः

नेवारहरूको साझा राष्ट्रिय संगठन नेवाः देय् दबूका सल्लाहकार तथा पूर्व वरिष्ठ उपाध्यक्ष चन्द्रलाल राजभण्डारीको निधन भएकोमा असोज २० गते मंगलबार श्रद्धाञ्जली कार्यक्रम आयोजना गरिएको छ। नेवाः देय् दबूको केन्द्रीय कार्यालयमा सल्लाहकार राजभण्डारीको निधन भएको १३औँ दिनको पुण्य तिथि पारेर उक्त श्रद्धाञ्जली कार्यक्रम गरिएको हो। नेवाः देय् दबूकी केन्द्रीय अध्यक्ष रश्मिला प्रजापतिको अध्यक्षतामा भएको उक्त कार्यक्रममा देय् दबूका विभिन्न तहमा रहेर नेतृत्व गर्नुभएका व्यक्तित्वहरूको उपस्थिति रहेको थियो। मौन धारण गरी सुरु गरिएको उक्त कार्यक्रममा दिवङ्गत राजभण्डारीको तस्बिरमा माल्यार्पण तथा फूल अर्पण गरिएको थियो। देय् दबूका महासचिव श्रीकृष्ण महर्जनले सञ्चालन गर्नुभएको उक्त श्रद्धाञ्जली कार्यक्रममा देय् दबूका संरक्षकद्वय नरेशकुमार ताम्राकार र पवित्र बज्राचार्यका साथै अध्यक्ष प्रजापतिले दिवङ्गत चन्द्रलाल राजभण्डारीले नेवाः देय् दबूको संगठन विस्तारका सवालमा अतुलनीय योगदान पुर्‍याउनुका साथै जीवनको अन्तिम समयसम्म पनि नेवाः देय् दबूको माध्यमबाट नेवारहरू एकजुट हुनुपर्छ भनी भूमिका निर्वाह गर्नुभएको चर्चा गर्नुभएको थियो।

नेवाः देय् दबूका सल्लाहकार तथा नेपाल आदिवासी जनजाति महासंघका उपाध्यक्ष चन्द्रलाल राजभण्डारीको नेपाल संवत् ११४६ यंलाथ्व त्रयोदशी (२०८३ असोज ८ गते, बिहीबार) भारतको दिल्लीमा उपचारका क्रममा निधन भएको थियो।