स्वक्वःगु प्रदेश भाषा दिवसय् नेवाः देय् दबूया सक्रिय ब्वति

११४६ बछलागा पञ्चमी (२०८३ वैशाख २४ गते) बिहीबार
बागमती प्रदेश सरकारले वैशाख २४ गते बिहीबार तेस्रो प्रदेश भाषा दिवस विभिन्न कार्यक्रम गरी मनाएको छ। बागमती प्रदेश सरकारले वि.सं. २०८१ देखि वैशाख २४ गतेको दिनलाई प्रदेश भाषा दिवसका रूपमा मनाउँदै आएको हो। प्रदेश सरकारी कामकाजको भाषा ऐन, २०८० बमोजिम प्रदेश सरकारले २०८१ देखि प्रदेश भाषा दिवस मनाउन थालेको हो। उक्त ऐन २०८० साल कात्तिक २३ गते प्रदेश राजपत्रमा प्रकाशित भएको थियो।
यस पटक तेस्रो प्रदेश भाषा दिवसका अवसरमा भक्तपुरको दूधपाटीदेखि भक्तपुर दरबार क्षेत्र (लाय्कू)–दत्तात्रेय–कमलविनायक हुँदै लन्चा फल्चा भत्क्यापाटीसम्म र्याली आयोजना गरिएको थियो। र्यालीपश्चात् मूल समारोहअन्तर्गत लन्चा फल्चा भत्क्यापाटीमा विशेष कार्यक्रम गरिएको थियो।
उक्त कार्यक्रममा नेवाः देय् दबूको नेतृत्वमा नेवारहरूको सांस्कृतिक बाजागाजासहित व्यापक सहभागिता रहेको थियो। नेवाः देय् दबूकी केन्द्रीय अध्यक्ष रश्मिला प्रजापतिको नेतृत्वमा केन्द्रीय नेतृत्वका साथै उपत्यका विशेष प्रदेश, काठमाडौँ, ललितपुर र भक्तपुर जिल्ला समितिहरूले सहभागिता जनाएका थिए।