नेवाः देय् दबूया न्हापांगु राष्ट्रिय परिषद्या मुँज्या येँ क्वचाःगु दु । नेसं. ११४६ यंगाला सप्तमी कुन्हु येँया क्रिष्टल पार्टी भन्यू विजुली बजार नयाँ बानेश्वरय् दबूया नायः रश्मिला प्रजापतिया नायःसुइ जूगु उगु परिषद मुँज्या जूगु खः ।
उगु मुँज्याय् न्हापांगु चरणय् मूपाहाँकथं झायादीम्ह संरक्षक नरेशकुमार ताम्रकारं पानसय् मत च्याकाः ज्याझ्वः उलेज्या यानादीगु खः । अथेहे नायः रश्मिला प्रजापतिं ज्याझ्वलय् देय् न्यंकं ब्वति काःझाःपिं सकल राष्ट्रिय परिषदया दुजःपिन्त लसकुस नापं ज्याझ्वःया तातुना न्ह्यब्वयादीगु खः । ज्याझ्वलय् संरक्षकपिं संरक्षक नरेशकुमार ताम्रकार, संरक्षक पवित्र बज्राचार्ययात संरक्षक मनोनय पौ व सल्लाहकारपिं डा. पुष्पराज राजकर्णिकार, डा. मुक्ति प्रधान, मा. कुलभक्त शाक्य, लोककवि राजभाइ जकःमि, भाजु जयकुमार श्रेष्ठ, डा. बज्रमुनि बज्राचार्य, मय्जु संगीता श्रेष्ठ, डा. सिलु मानन्धरयात सल्लाहकार मनोनयन पौ लःल्हानादीगु खः ।
निगूगु चरणय् छसिंकथं नापः रश्मिला प्रजापतिपाखें संस्थाया दच्छि दुने यायेगु कार्ययोजना, मूछ्याञ्जे श्रीकृष्ण महर्जनं तःमुँज्या लिपाया संस्थाया प्रगति प्रतिवेदन, दांभरि माइला डंगोलं आ.व. २०८२/०८३ या लेखा परीक्षण प्रतिवेदन व आर्थिक विवरण पेश यानादीगु खः । उगु प्रतिवेदनयात कयाः मुँज्याय् ब्वति कयादीपिं राष्ट्रिय परिषदया दुजःपिं दथ्वी सहलह यासें पारित यायेगु ज्या जुल । अथेह केन्द्रीय समितिपाखें प्रस्तावित वइगु आ.व. २०८३/८४ या नितिं अनुमानित बजेट, लेखापरीक्षक नियुक्ति, बार्षिक कार्ययोजना नं पारीत यायेगु ज्या जूगु खः । ज्याझ्वलय् नेवाः देय् दबूया केन्द्रीय समितिया पदाधिकारी दुजः, सल्लाहकार समिति, प्रदेश समितिया नायः व प्रतिनिधिपिं, विषयगत समितिया नायःपिं जातीय परिषदया प्रतिनिधिपिन्सं ब्वति कयादीगु खः ।
