थौं नेवाः देय् दबूया स्वीनिक्वःगु बुदिंया लसताय् नेवाः देय् दबूपाखें थःगु हे अनलाईन पोर्टल संचालनय् हःगु दु । थुगु हे अनलाईन पोर्टलयात कया नेवाः देय् दबूया केन्द्रीय नायः रश्मिला प्रजापतिलिसे यानागु न्ह्यसःलिसः थुगु कथं दुः
न्ह्यसः नेवाः देय् दबूया अनलाईन पोर्टल छाय् माःगु खः ?
लिसः न्हय्गू प्रदेश खुइ च्यागू जिल्ला समिति अले निसलंसिबें अप्वः पालिका समितित दु अन छुं नं छुं गतिविधि जुयाच्वनीगु तर उगु गतिविधि ब्वयेगु सकलसिनं सिइकेगु थाय् मन्त । गतिविधि थ्वथ्व जुल धकाः तयेगु थाय् मन्त । वेभसाईटय् फुक्क खँ तये मछिंगु जुया छगू अनलाई पोर्टल हे दयेका न्हिया न्हिथं देय् दबूया छु छु समितिं छु छु ज्या यानाच्वंगु दु धैगु खँ तये अःपुइगु नापं देय्न्यंकं गतिविधि सीके फैगु जुया अनलाईन पोर्टल माःगु खः । अथे हे खँल्हाबल्हा, च्वसू, सहित्य थीथी विधात दु वपाखें नेवाः देय् दबुलिइ आबद्ध नापं नेवाः देय् दबुलिइ स्वाःपिंलिसे खल्हाबल्हा नापं नेवाः देय् दबू नाप स्वाना मच्वंपिं नेवाः जनप्रतिधिपिनिगु खँल्हाबल्हा, नेवाः देय् दबूया थीथी समितिया नेतृत्व यानाच्वंपिनिगु खँल्हाबल्हा नापं गतिविधि नं न्ह्यब्वये छिनीगु जुया थ्व अनलाईन पोर्टल न्ह्याकागु खः ।
न्ह्यसः नेवाः देय् दबू गतिविधि गुगु कथं वइ ?
देय्न्यंकंया नेवाः देय् दबूपाखें छु छु ज्याझ्वः जुयाच्वन । व ज्याझ्वः वयकःपिन्सं छ्वया हयादी । वय्कःपिन्सं छ्वयाहयेत ब्यागलं ईमलेया व्यवस्था यानागु दु । खला थुकिइ हलिं न्यंकंया नेवाःतसें नं थःपिनिगु गतिविधि छ्वया हयेजिउ । वला अन्तर्राष्ट्रिय कोलम नं दु । देय् दबूपाखें यानाच्वंगु अन्तर्राष्ट्रिय ज्याझ्वः ला जु हे जुल व नापं अन्तर्राष्ट्रिय रुपं नेवाःतसें यानाच्वंगु गतिविधि नं दुथ्याकेगु जुइ । थौं नेवाः देय् दबूया स्वीनिक्वःगु बुदिंया लसताय् शुभारम्भ यानागु जुल ।
न्ह्यसः आःया नितिं थुगु पोर्टलय् थुकिइ छु छु दुथ्यात ?
लिसः नेवाः देय् दबूया च्याक्वःगु तःमुँज्या लिपाया गुलि नं नेवाः देय् दबूया आः तकया गतिविधि खः उकियात छसिंकथं तया वनेगु ज्या यानागु दु । थ्व ज्या मदिक्क जुइ । न्हिया न्हिथं नेवाः देय् दबूपाखें जूगु ज्याखँत थुकिइ तया वनेगु जुइ । नापं थुकिइ साहित्यनिसें च्वसू नं दुथ्याके फैगु जुया सकलसिन इनाप नं दु कि छिगू साहित्य, च्वसू नं तयेगु इच्छा दुसा जिमित छ्वया हयादीत इनाप यानाचवना । थ्व नकतिनि न्ह्याःगु जुल । थुकिइ सकल नेवाःतय्गु खँ नं दुथ्याका यंकेगु जुइ । उकिया नितिं सकल नेवःतसें नं थःथःगु थासं सक्रिय जुया भूमिका म्हितादी धकाः आशा याना ।
न्ह्यसः स्वीनिक्वःगु बुदिं औपचारिक रुपं भब्य समोहर हे याना छाय् याना मदीगु खः ?
लिसः खला झीसं स्वीनिक्वःगु बुदिं थुगुसी धरानय् तःजिक यायेगु धकाः क्वछिनागु खः । उकिया तयारी नं यानागु खः । वंगु भाद्र १० गते भोटेकोशी खुसिबा वया गुगु थकं रसुवा, नुवाकोट, धादिङ, चितवन लगायतय तच्वकं वःगु विनासकारी खुसिबाःपाखें तःधंगु जनधनया क्षति जुल । यक्व मनूतय्गु ज्यान वन । वस्ती वस्ती हे वन । कयौं मनूत विस्थापित जुल । देय्यात हे छगू कथं विपद वःगु थें जुल । थ्व इलय् झीसं देय् दबूया बुदिं उत्सव कथं भब्य समारोह याना हनेगु पायछि जुयमखु धकाः झीसं उकियात दिका । धरानय् यायेगु धकाः दक्ल तयार जुइ धुंकाः नं उकियात दिकेमाल । उकिं झीसं थ्व हे अनलाईन पोर्टल न्ह्याका जक भब्य समारोह मयासे बुदिं हना धायेमाली ।
