नेवाः देय् दबूया स्वीनिक्वःगु बुदिंया लसताय् संरक्षक नरेश ताम्रकारया भिंतुना सन्देश

ज्वजलपा,
थौं नेवाःतय्गु मंकाःगु राष्ट्रिय संगठन नेवाः देय् दबूया स्वीनिक्वःगु बुदिंया लसताय् सकल नेवाःपिं नेपालय् दुने व नेपालं पिने च्वनादीपिं सकलसित भिंतुना देछायाच्वना ।
नेवाः देय् दबू नीस्वनेत उगु इलय् योगदान बियादीपिं हनेबहःपिं सकल संस्थापकपिन्त हनाबनातसें नेवाःय्गु राष्ट्रिय संगठन गुगु कथं देय्न्यंकं नापं नेपालं पिने नं ज्या यानाच्वंगु दु, थुगु ज्या सुथांलाक्क न्ह्याके फयेमा धकाः सकलसित भिंतुना देछाय् ।
नापं नेवाःतय्गु थ्व राष्ट्रिय संगठन नेवाः देय् दबूयात नेपाःया दुर दराजय् दुपिं गांगाय् दुपिं, वस्ती वस्तीइ दुपिं नेवाःतय्त जि नेवाः खः धकाः गौरव तायेकेगु ज्या नेवाः देय् दबूपाखें यानाच्वंगु दु थुकियात मदिक्क न्ह्याका यंकेमाःगु दु । अझ नं गां गामय् वस्ती वस्ती यक्व नेवाःत नेवाः देय् दबुलिइ दुथ्यायेत ताः लानाच्वंगु मदुनि ।
नेवाः भाषा, कला, संस्कृति संरक्षण यायेगु, म्वाकातयेगु, प्रचार प्रसार यायेगु, नेवाःतय्त छप्पँ छधी यायेगु थुकिया मू आज्जु खः । थ्व याना हे च्वंगु दु । अझ नं नेवाःतय्त पहिचान, राज्यया हरेक ख्यलय् प्रतिनिधित्वया नितिं देय् दबूपाखें यायेमाःगु ज्या यानाच्वंगु दु ।
अझ नं थुकियात अझ ब्यापक रुपं यायेमाःगु दु । थुकिया नितिं सकल नेवाःत छप्पँ छधी जुया सकल नेवाःतय्गु छगू हे जक राष्ट्रिय संगठन नेवाः देय् दबूयात बःलाकेगु ज्याय् थौंया दिनय् सकलसिनं सकल्प यायेनु । थ्व हे सकलसित भिंतुना सुभाय् ।