नेवाः देय् दबूया ग्वसालय् येँय् ‘बागमती प्रदेशय् सरकारी कामकाजया भाषा ऐन कार्यान्वयनया अवस्था, चुनौती व भावी योजना’ विषयस अन्तरक्रिया ज्याझ्वः क्वचाल। जेठ १० गते आइतवाः बागमती प्रदेशया थीथी स्थानीय सरकारया प्रतिनिधिपिं ब्वति काःगु उगु ज्याझ्वः नेवाः देय् दबूया नायः रश्मिला प्रजापति श्रेष्ठया सभापतित्वय् जूगु खः।
ज्याझ्वलय् पाँचखाल नगरपालिकाया उपप्रमुख सूर्यमाया दनुवार, पनौती नगरपालिकाया उपप्रमुख गीता बन्जरा, बेथानचोक गाउँपालिका उपाध्यक्ष तारा राणा तिमिल्सीना, काठमाडौँ महानगरपालिका वडा नं. १२ या वडा अध्यक्ष बालकृष्ण महर्जन, टोखा नगरपालिका वडा नं. ७ या दुजः गोपीकृष्ण पाठक, कागेश्वरी मनोहरा नगरपालिका कार्यपालिका दुजः रूपमती भण्डारी, व उगु हे नगरपालिका वडा नं. ९ या दुजः भगवती पाण्डे लगायतपिनिगु ब्वति दुगु खः।
अन्तरक्रिया ज्याझ्वलय् भाषा आयोगया दुजः डा. पुष्करराज भट्टं प्रदेशय् भाषा ऐन वयेधुंकूगु अवस्थाय् पालिकातय्गु नं कामकाजी भाषाया रूपय् कार्यान्वयन याये फइगु व उकिया लागिं आयोग आवश्यक सहयोग यायेत तयार दुगु खँ धयादिल।
जनप्रतिनिधिपिन्सं बागमती प्रदेशया भाषा ऐन, नेपालया संविधान अले स्थानीय सरकार सञ्चालन ऐन कथं भाषायात मान्यता बिइत व कामकाजी भाषाया रूपय् लागू यायेत स्वयं समुदायं नं भूमिका म्हितेमाःगु खँ धयादिसें भाषा आयोगया नं सहयोग आवश्यक दुगु खँ धयादिल।
ज्याझ्वलय् नेवाः देय् दबूया वरिष्ठ न्वकू सत्यनारायण डंगोलं बागमती प्रदेश भाषा ऐनया बारे स्पष्ट यानादिल। नेपाल तामाङ घेदुङया सह-अध्यक्ष सरोज मोहन लामां तामाङ भाषा, नेपाल भाषा थें हे सकल मातृभाषाया महत्त्वबारे प्रकाश क्यनादिसें वृत्तचित्र न्ह्यब्वयादिल अले सरकारं स्वीकृति बिउसां थीथी समस्याया कारणं स्थानीय प्रशासनिक क्षेत्रय् मातृभाषा प्रयोगय् हयेत थाकुयाच्वंगु खँ धयादिल। भाषा ऐन कार्यान्वयनया अवस्था, चुनौती व भावी योजना विषयस चर्चा यानादिसें नेवाः देय् दबूया उपाध्यक्ष उमेश स्थापितं अप्वःथें थासय् नेपाल भाषा व तामाङ भाषाया लिपिं साइनबोर्ड तकं तयेत स्थानीय तहस हिचकिचाहट खनेदूगुलिं जनजागरण व सचेतना प्यंकेगु तसकं आवश्यक दुगु जानकारी बियादिल।
दबूया नायः रश्मिला प्रजापति श्रेष्ठं नेवाः देय् दबूं अजागु ज्याझ्वः छुं जिल्लाय् जुइधुंकूगु व ल्यं दूगु जिल्लाय् याकनं याना वनेगु लक्ष्य दूगु खँ धयादिल। वय्कलं भूगोल व परिवेशया बाध्यतायात मध्यनजर यानाः गुगु थासय् गुगु प्रकारया शैलीं ल्हाइ, उगु हे तरिकां भाषा म्वाका तयेगु आवश्यक दूगु खँ धयादिल।
ज्याझ्वलय् ब्वति काःपिन्त थाय् कथं प्यंगू पुचलय् ब्वथलाः जिल्ला व पालिकातय्सं यायेमाःगु तौरतरिका व अपनाय्माःगु प्रक्रियाबारे पुचःगत विचारत मुंकाः न्ह्यब्वयेकातःगु खः। ज्याझ्वलय् भाषा आयोगया दुजः लगायत पालिकाया प्रतिनिधिपिन्सं थःगु बिचार प्वंकादीगु खः। ज्याझ्वलय् स्वागत मन्तव्य स्वनिगः विशेष प्रदेशया अध्यक्ष नविन थेच्वमीं बियादीगु खः सा महासचिव श्रीकृष्ण महर्जनं ज्याझ्वः न्ह्याकादीगु खः।
नेवाः देय् दबूं अजागु हे ज्याझ्वः थुकिया स्वया न्ह्यः चितवन, दोल्खा व रामेछापय् यायेधुंकूगु दु सा आः मकवानपुरया हेटौँडाय् नं यायेगु योजना दूगु खँ धयादीगु दु।
