नेवाः देय् दबूपाखें प्रतिनिधिसभाया नेवाः सांसदपिन्त हन

नेवाःतय्‌गु साझा राष्ट्रिय संगठन नेवाः देय् दबूपाखें प्रतिनिधिसभाया नेवाः सांसदपिन्त हनेज्या याःगु दु। वंगु बैशाख १८ गते राजधानीय् छगू विशेष समारोहया दथुइ सांसदपिन्त हनेज्या याःगु खः। थ्व ज्याझ्वः नेवाः देय् दबूया केन्द्रीय नायः रश्मिला प्रजापतिया सभापतित्वय् जूगु खः। नेवाः देय् दबूया संरक्षक लिसे नेपालभाषा एकेडेमिया चान्सलर मल्ल के. सुन्दरया मूपाहाँसुइ थ्व ज्याझ्वः जूगु खः। ज्याझ्वलय् देय् दबूया संरक्षकपिं नरेश ताम्राकार व पवित्र बज्राचार्य विशेष अतिथि कथं झाःगु खः। देय् न्यंकया थीथी निर्वाचन क्षेत्र व समानुपातिकपाखें निर्वाचित जुयादीपिं १८ म्ह प्रतिनिधिसभाया नेवाः सांसदपिन्त छगू हे दबुलिइ हनेज्या याःगु खः। सकल प्रतिनिधिसभाया सांसदपिन्त सम्मान पत्रया नापनापं नेवाः परम्परा कथं सगं बीगु ज्या जूगु खः। देय् दबूया मूछ्याञ्जे श्रीकृष्ण महर्जनं न्ह्याकादीगु ज्याझ्वलय् विशेष पाहाँ ताम्राकार व बज्राचार्यं भिंतुना मन्तव्य बियादीगु खः। वय्‌कःपिन्सं प्रतिनिधिसभाया सदस्यपिन्सं नेवाः समुदायया प्रतिनिधित्व यासें समुदायया लागिं ज्या यायेमाःगु खँय् बः बियादीगु खः। ज्याझ्वलय् सांसदपिन्सं थःपिं नं नेवाः समुदायया हे जुयागुलिं समुदायया खँ अवश्य नं थ्वयेकेगु खँ धाःगु खः। देसय् च्वंपिं हरेक समुदाय मध्ये नेवाः समुदायया सवालय् समुदाय नापं च्वनाः खँल्हाबल्हा यानाः न्ह्याः वनेगु वचन बियादीगु खः।