नेवाः समुदायया मंकाःगु राष्ट्रिय संगठन नेवाः देय् दबूया केन्द्रीय समितिनिसें प्रदेश समिति, जिल्ला समिति, पालिका समिति नापं वडा समितिया ग्वसालय् देय्न्यंकं भदौ २२ गते छगू हे ई सनिलया ६ बजे सलंसः थासय् श्रद्धाञ्जली ज्याझ्वः जूगु दु ।
भोटेकोशी खुसि बाः वया, चलः वना रसुवा, नुवाकोट, धादिङ, चितवन लगायत जिल्लाय् मदुपिं सकलसित लुंमकाः इमिगु चीर शान्तिया कामना नापं दुःखंकःपिं सकलसित धैर्य धारण यायेफयेमा, घाःपाःजूपिन्त याकनं वासः यायेमाःगु व उद्धारया ज्या तिब्र यायेमाःगु शोक बक्तब्य जारी याना छगू हे कथंया सन्देश सहित देय्न्यंकं श्रद्धाञ्जली ज्याझ्वः याःगु खः धकाः नेवाः देय् दबूया मूछ्याञ्जे श्रीकृष्ण महर्जनं कनादीगु दु ।
येँया बसन्तपुलिइ जूगु केन्द्रीय स्तरया ज्याझ्वलय् देय् दबूया केन्द्रीय नायः रश्मिला प्रजापतिं शोक वक्तब्य ब्वना न्यंकादीगु खः । उगु ज्याझ्वः नेवाः देय् दबूया केन्द्रीय समिति नापं स्वनिगः विशेष प्रदेश समिति, येँ जिल्ला समिति, येँ महानगर समिति, थीथी जातीय संगठन, नेवाः पत्रकार राष्ट्रिय दबू, आदिवासी जनजाति पत्रकार महासंघ उपत्यका समन्वय समिति, नेवाः देय् दबूया विषयगत संगठन नापं थीथी खलः पुचःया मंकाः ग्वसालय् जूगु खः । यलय् नेवाः देय् दबू यल जिल्ला समिति व ज्यापु समाज यलया मंकाः ग्वसालय जूगु खःसा ख्वपय् नेवाः देय् दबू ख्वप लागा व नेवाः मिसा दबू ख्वप लागाया मंकाः ग्वसालय् श्रद्धाञ्जली ज्याझ्वः जूगु खः । स्वनिगलय् हे किपुलिइ, जामाच्व नगरय्, भुइजःसिइ, महालक्ष्मी नगरय् नापं थीथी लागाय् नेवाः देय् दबूया स्थानीय समितिया ग्वसालय् जूगु खः ।
भोटेकोशी खुसिबाः वःगु झिंस्वन्हुया न्हि लाका देय् न्यंकंया फुक्क प्रदेश, पूर्व मेचिंनिसें पश्चिम महाकालीया थीथी थासय् दुगु नेवाः देय् दबूया स्थानीय समितिया ग्वसालय् नुवाकोट, चितवनया नारायणी खुसि सिथय्, ताडी चोक, मुङलिङ, माडि, पर्सा, विरगञ्ज, धरान, सिन्धुली, जिरी, गैंडाकोट, अरुण खुसि, कावासोती, खोटाङ, उदयपुर, खैरनी, दोल्खा, रामेछाप, सिन्धुली, मकवनापुर, धादिङ, काभ्रेपलाञ्चोक, दैलेख, सुर्खेत, जुम्ला, सल्याण लगायत थाय् थासय् श्रद्धाञ्जली ज्याझ्वः जूगु खः ।
उगु इलय् श्रद्धाञ्जली प्वंकेगु नाप नापं देय्न्यंकं जारी याःगु शोक वक्तब्य थुगु कथं दुः
झिंस्वन्हुय पुण्यतिथिइ श्रद्धाञ्जली नापं शोक वक्तव्य
नेपाल संवत ११४६ गुंलाथ्व त्रयोदशी बुधवाः (२०८३ साल भदौ १० गते) रसुवा, नुवाकोट, धादिङ, चितवनलगायतया जिल्लाय् वःगु विनाशकारी खुसिबाः, चलः नापं प्राकृतिक विपदय् लाना ज्यानवंपिं नेवाः देय् दबू नुवाकोट जिल्ला समितिया दांभरी सरिता जोशी, ल्यूछ्याञ्जे गीता श्रेष्ठ लवत नापं फुक्क मदुपिंप्रति थौं झिंस्वन्हुया पुण्यतिथिसं नेवाः देय् दबूपाखें भावपूर्ण श्रद्धाञ्जली प्वंकाच्वना ।
थुगु दुःखद् घटनापाखें थः मनूत मदुपिं दुःखंकःपिं सकलसित धैर्य धारण याये फयेमा धकाः बिचाः हायेकुसें घाःपाः जूपिन्त याकनं लनेमा धकाः कामना यानाच्वना । बेपत्ता जूपिन्त तत्काल मालेगु, उद्धार यायेगु, प्रभाविति परिवारयात माःगु राहत व आधारभूति सेवाया व्यवस्था नापं छेँ मदयेका च्वनेमाःपिन्त याकनं हे पुनस्थापनाया नितिं सम्वविन्धित निकायया गम्भीर ध्यानाकर्षण यानाच्वना ।
जलवायु परिवर्तनं चरम मौसमी घटना नापं प्राकृतिक विपद्या जोखिम अप्वया वनाच्वंगु सन्दर्भय् जलवायु जोखिमय् दुगु मुलुक नेपालय् तःधंगु मानवीय नापं भौतिक क्षति जूगु दु । जलवायु परिवर्तनय् नेपाःया योगदान नगण्य जुइक जुइकं नं थज्वःगु कथंया नेपाःयात तःधंगु क्षति जूगु यथार्थयात अन्तर्राष्ट्रिय समुदायसमक्ष प्रभावकारी कथं खँ ल्ह्वना जलवायु न्याय, हानि नापं क्षतिया नितिं अन्तर्राष्ट्रिय संयन्त्रपाखें नेपालयात दइगु वित्तीय नापं प्राविधिक ग्वहालि सुनिश्चित यायेत सरकारं अन्तर्राष्ट्रियस्तरय् दृढतापूर्वक सः तयेमाःगु दु ।
नापं, भविष्यय् थज्वःगु विपद्पाखें जुइगु जनधनया क्षति म्हो यायेत प्रभावकारी पूर्वसूचना प्रणाली, जोखिमयुक्त बस्तीया व्यवस्थापन, खुसिया प्राकृतिक बहाव लागाया संरक्षण नापं विपद् पूर्वतयारी व उद्धार संयन्त्रयात अझ अप्वः बांलाका यंकेत राज्यं दीर्घकालीन नीति नापं योजना नालेत नेवाः देय् दबूपाखें इनाप यानाच्वना ।
मदुपिं सकलप्रति हाकं छकः भावपूर्ण श्रद्धाञ्जली अर्पणयासें दुःखंकःपिं सकल छेँजःपिन्त धैर्य धारण यायेगु शक्ति दयेमा धकाः कामना यानाच्वना ।
हार्दिक श्रद्धाञ्जली ! बिचाः हायेका ।
