येँ (नेवाः देय् दबू ) – नेपाःया साहित्यिक ख्यलय् ताःहाकःगु इतिहास दुगु नेपाल प्रज्ञा प्रतिष्ठानया नवनियुक्त पदाधिकारी (प्राज्ञ)तय् कार्यविभाजन याःगु दु । प्रतिष्ठानया कुलपति कुमार नगरकोटीया अध्यक्षताय् च्वंगु मुँज्यां नवनियुक्त प्राज्ञतय् विभागीय जिम्मेवारी क्वःछिउगु खः ।
मुँज्यां प्रतिष्ठानया उपकुलपति अविनाश श्रेष्ठयात गद्य व प्रकाशन, सदस्य सचिव डा. रोशन शेरचनयात दर्शन विभागया जिम्मेवारी बिउगु दु । अथे हे प्राज्ञ प्रतिसरा साय्मियात लोक साहित्य व नारी लेखन, प्राज्ञ सीता तुम्खेवायात मातृभाषा व लिपि, प्राज्ञ रुपा झा धीरुयात बाल व किशोर साहित्य, प्राज्ञ डा. कृष्णराज सर्वहारीयात सामाजिक शास्त्र व इतिहास, प्राज्ञ तीर्थ गुरुङयात अनुवाद, मौखिक इतिहास व अन्तर्राष्ट्रिय सम्बन्ध विभागया जिम्मेवारी बिउगु दु ।
थुकथं हे नविन अभिलाषीयात दलित साहित्य, युवा लेखन व डिजिटलाइजेसन, प्राज्ञ दीपक सापकोटायात काब्य, संस्कृति व डिजिटलाइजेसन, प्राज्ञ डा. दुर्गाबहादुर घर्तीयात समालोचना, भाषा, ब्याकर व कोष विभाग प्रमुखया जिम्मेवारी बिउगु दु ।
प्रज्ञा प्रतिष्ठानया नवनियुक्त प्राज्ञतय्गु पद व गोपनीयताया सपथलिपा वंगु साउन २६ गते कमलादिस्थित प्रज्ञा भवनया ज्याकुथिइ कार्यभार ग्रहण यानादीगु खः । नवनियुक्त प्राज्ञपिंत कुलपति नगरकोटीं वंगु साउन २२ गते संस्कृति, पर्यटन तथा नागरिक उड्डयनमन्त्री खडकराज पौडेलया उपस्थितिइ सपथ ग्रहण याकादीगु खः ।
थ्व हे झ्वलय् प्रतिष्ठानं वइगु गुंलागा त्रयोदशि, कुन्हु राष्ट्रिय गजल दिवस हनीगु जूगु दु । प्रतिष्ठानया प्राज्ञतय् उगु मुँज्यां दँय्दसं अबुया ख्वाः स्वयेगु दिं मोति जयन्तीकुन्हु राष्ट्रिय गजल दिवस हनेगुस व सुदूरपश्चिम प्रज्ञा प्रतिष्ठान लगायत सरोकारवाला संघसंस्थालिसे समन्वय यानाः वइगु मंसिरया दुने सुदूरपश्चिम प्रदेशस्तरीय साहित्य महोत्सव यायेगु निर्णय नं याःगु दु ।
