येँ (नेवाः देय् दबू ) -नेपालभाषा साहित्य ख्यःया नांजाःम्ह बाखं च्वमिलिसें शिक्षाविद्, नेवाः न्ह्यलुवा हितकरवीर सिंह कंसकारया नेपालभाषाया स्वंगू बाखं सफू वंगु आइतवाः छगू ज्याझ्वःया दथुइ पितब्वज्या जुल । नेपालभाषा सफू गुथि (समाज) व नेवाः सूचना केन्द्रया मंकाः ग्वसालय् थनया भिंद्यः त्वालय् जूगु ज्याझ्वलय् बाखं च्वमि कंसकारया स्वंगू सफूया पितब्वज्या याःगु खः ।
ज्याझ्वःया मूपाहां वरिष्ठ समालोचक प्रा.डा. सुन्दरकृष्ण जोशीं ‘अगिंमथः’, ‘मिजला’ व ‘लूजः’ बाखं सफूया पितब्वज्या यानादीगु खः । पितब्वज्या जूगु सफूमध्ये ‘अगिंमथः’ व ‘मिजला’ निगूगु संस्करण खःसा ‘लूजः’ न्हापांगु संस्करण खः ।
ज्याझ्वलय् नवासें वरिष्ठ समालोचक प्रा.डा. जोशीं पुलांगु बाखं घटना प्रधान जुइगु, न्हूगु बाखं चरित्र प्रधान जुया मनोदशा ब्वयातःगु जुइ धयादिल । बाखं च्वमि कंसकारया बाखंया विषय वस्तु व बाखंया अन्त्य गद्य चिनाखँ थें च्वयाः क्वचायेकातःगु च्वछायेबहजू धयादिल ।
विशेष पाहां नेपालभाषा एकेदेमिया चान्सलर मल्ल के. सुन्दरं नेपालभाषाय् बाखं विधायात कयाः नुगःखँ तयादिसें बाखं विधाय् नं च्वन्ह्याःम्ह कविकेशरी चित्तधर हृदयया पौ बाखं ब्वनाः न्यंकादीगु खः । वय्कलं भाषानिभाः प्रेमबहादुर कसाः, रत्नध्वज जोशी, पूर्ण पथिक लगायतं बाखं साहित्यय् बियादीगु योगदान कयाः चर्चा चर्चा यानादीगु खः ।
लिसें वय्कलं नेपालभाषा बाखं साहित्यय् ‘अगिंमथः’ तसकं चर्चितलिसें विवादित जूगु बारे नं कनादीगु खः । थुकथं हे पितब्वज्या जूगु स्वंगुलिं बाखं सफूया भाव अग्नि, ज्वाला व विद्रोहया भाव व सः जूगु नं वय्कलं न्ह्यथनादिल ।
बाखं च्वमि कंसकारं विद्रोहया भाव खनेदुगु अगिंमथः सफूया नां तयेत जनकवि दुर्गालाल श्रेष्ठं सल्लाह बियादीगु खँ वय्कलं लुंमकादिल । लिसें वय्कलं नेपालभाषा साहित्य व साहित्यिक संस्थायात धिसिलाकेत ग्वाहालिकथं स्वंगुलिं सफू नेपालभाषा सफू गुथि (समाज)यात लःल्हानादीगु खः । उगु इलय् वय्कलं सफूया न्याये मीगु दक्वं भाला गुथिया हे जुइगु नं कनादिल ।
गुथिया नायः हरिप्रसाद श्रेष्ठया सभापतित्वय् जूगु ज्याझ्वलय् छ्याञ्जे महेन्द्रगोपाल कर्माचार्यं लसकुस यानादीगु खः ।
नेपाल प्रज्ञा प्रतिष्ठानया नवनियुक्त प्राज्ञ प्रतिसरा साय्मिलिसें आपालं वरिष्ठ साहित्यकारपिनिगु उपस्थिति दुगु ज्याझ्वलय् मूपाहां, पाहां, सफू च्वमि व ग्वसाः खलःयात च्वमि कंसकारया छेँजःपाखें कसाःगा न्ययेकाः हनेज्या याःगु खः ।
कंसकारया बाखं सफू अगिंमथःयात ने.सं १०८४ या ‘श्रेष्ठ सिरपाः’ लःल्हाःगु खः ।
