म्याड्रिड – स्पेनिस क्लब बार्सिलोनां सिजनया न्हापांगु उपाधि त्याकाः औपचारिक शुरुवात याःगु दु । बार्सिलोनां ६१ क्वःगु जोआन गाम्पर ट्रफी त्याकाः २०२६-२७ या सिजनया सुखद व औपचारिक शुरुवात याःगु खः ।
घरेलु मैदान नोउ क्याम्पय् जूगु कासाय् बार्सिलोनां इजिप्टया अल अहलीयात २-१ गोलं बुकाः उपाधि त्याकूगु खः । अल अहली प्रतिष्ठित प्रि सिजनया कासा म्हितूगु न्हापांगु अफ्रिकी क्लब जूगुलिं थुगु संस्करणया कासा विशेष जूगु खः ।
बार्सिलोनाया निंतिं हम्जा अब्देलकरिम व राफिन्हां छगू छगू गोल याःगु खःसा अल अहलीया निंतिं जिजो सान्त्वना गोल याःगु खः । अब्देलकरिमं थःगु हे पूर्व क्लब विरुद्ध न्हापांगु हाफया २९ औं मिनेटय् गोल यानाः बार्सिलोनायात अग्रता बिउगु खः । निगूगु गोल न्हापांगु हाफया निर्धारित ईया अन्तिम मिनेटय् कप्तान राफिन्हां पेनाल्टीइ गोल यासें बार्सिलोनायात २-० या अग्रता बिउगु खः । अल अहलीया जिजों निगूगु हाफया खुगूगु मिनेटय् सान्त्वना गोल याःगु खः ।
थुगु हे सिजनय् जक बार्सिलोना वःम्ह एन्थोनी गोर्डनं निगूगु हाफया ४४ औं मिनेटय् प्राप्त पेनाल्टीइ गोल यायेत असफल जुइवं बार्सिलोनां २ गोलं अग्रता कायेगु ह्वःताः त्वःफिकूगु खः । गोर्डनया पेनाल्टी प्रहार अहलीया गोलरक्षकं पंगु खः ।
सन् १९६६ लय् तत्कालीन अध्यक्ष एन्रिक लाउडेटं जोआन गाम्पर ट्रफीया शुरुवात याःगु खः । बार्सिलोनाया संस्थापक, पुलांम्ह कासामिलिसें अध्यक्ष जोआन गाम्परया सम्मानय् तयातःगु थ्व कासा दँय्दसं ला लिग शुरु जुइ न्ह्यः जुइगु कासा खः । थ्व कासा छगूकथं बार्सिलोनाया न्हापांगु टोलीयात घरेलु समर्थक दथुइ औपचारिक रुपं प्रस्तुत यायेगु परम्परागत ज्याझ्वःकथं कयातःगु दु।
उपाधि त्याकेत सफल बार्सिलोनां आः थ्व हे आत्मविश्वासलिसें स्पेनिस ला लिगाया थुगु सिजनया शुरुवात याइगु जूगु दु ।
