भाषा कला संस्कृति म्वाकेत
साहित्य लिपि सम्पदा म्वाकेत ।
नेवाः सभ्यता म्हसीका ल्यंकेत
नेवाः छवाः जुइत नेवाः देय् दबू ।।
पुर्खाया ज्ञान न्हूगु पुस्तायात लःल्हायेत,
पूर्व पश्चिम हिमाल तराई छवाः यायेत ।
सुखः दुखय् छवाः जुया जायेत
नेवाः छवाः जुइत नेवाः देय् दबू ।।
जातिया विविधताय् एकता ब्वलंकेत,
नेवाः नुगः ब्वलंकाः न्ह्यायेत ।
पंगः हाथ्या छवाः चीका वनेत,
नेवाः छवाः जुइत नेवाः देय् दबू ।।
आदिवासी अधिकारया सः थ्वयेकेत,
अधिकारया नितिं जुरुमुरुं दनेत ।
न्याय् समानता, स्वाभिमान ब्वलंकेत,
नेवाः छवाः जुइत नेवाः देय् दबू ।।
भाषा, लिपि, संस्कृति च्वन्ह्याकेत
नेवाः अस्तित्व न्ह्याबलें ल्यंकेत ।
नेवाः झी नेवाः हे जुया न्ह्यायेत,
नेवाः छवाः जुइत नेवाः देय् दबू ।।
श्रीकृष्ण महर्जन ‘नेवाः’
महासचिव, नेवाः देय् दबू
