- लोककवि राजभाइ जकःमि
छधी छपाँय् जुयाः दने दाजु किजा, तता केँ
सल्लंफल्लं ह्वय्के झीसं देय् दबूया नेवाः छेँ ।
देय् दबू झी हलिमया
नेवाःतय्गु मंकाः न्हाय्
नेवाः छेँ थ्व छिगु, जिगु,
सकसिगुं मंकाः बाय्
नेपाःगाःया स्वयम्भू क्वय् बुद्ध जलं खःगु बँय्
सल्लंफल्लं ह्वय्के झीसं देय् दबूया नेवाः छेँ ।
थ्व झी नेवाः छेँया थीजः
देश न्यंक खय्के
झीसं झीगु देय् क्वबीगु
नाय्खिं हे नं च्वय्के
झःझः धाय्क धस्वाके थ्व पुर्खा नस्वाः वःगु छेँ
छधी छपाँय् जुयाः दने दाजु किजा, तता केँ ।
पुर्खापिं थें चःति हाय्काः
थःगु तुती दने झी
ल्याय्म्ह-ल्यासे न्ह्यःने तयाः
न्हूगु युगय् वने झी
बास जक मखु थ्व झी नुगः - नुगः स्वाय्गु छेँ
छधी छपाँय् जुयाः दने दाजु किजा, तता केँ ।
हलिंया झी नेवाः मुने
देय् दबूया झण्डा क्वय्
संसारया थुवाः जुयाः
न्ह्या वनेगु मती तय्
नापनापं वने झी थ्व देय् दबूया आज्जु लँय्
छधी छपाँय् जुयाः दने दाजु किजा, तता केँ ।
