किपू (नेवाः देय् दबू ) – नेपालभाषाया लोकंह्वाःम्ह म्येँ हालामि सतिश महर्जनया याकः सांगीतिक ज्याझ्वः थौं जुइत्यंगु दु । ‘सतिशया सः, संगीतया जः’ नामं जुइगु उगु याकः सांगीतिक सनिल ज्याझ्वः किपूया कीर्तिपुर सिनेप्लेक्सय् जुइ ।
नेपाल कला संस्कृति उत्थान समाजया ग्वसालय् जुइगु सांगीतिक ज्याझ्वःया टिकट दक्वं चुइधुंकूगु विहीवाः ग्वसाः ग्वःगु छगू पत्रकार सम्मेलनय् जानकारी बिउगु दु । न्हिनसिया २ः३० ताः निसें सनिलया ६ ताःई तक न्ह्याइगु सांगीतिक ज्याझ्वलय् म्येँ हालामि सतिशं नेवाः व नेपाली यानाः १८ पु म्येँ न्ह्यब्वइगु पत्रकार सम्मेलनय् जानकारी बिउगु दु ।
म्येँ हालामि सतिशं सांगीतिक ज्याझ्वलय् थम्हं न्ह्यब्वयेगु म्येँ गोलाप्रथापाखें ल्ययागु खँ कनादीगु दु । सलंसःया ल्याखय् म्येँ हालादीधुंकूम्ह सतिशं थःगु उत्कृष्ट म्येँ गोलप्रथापाखें ल्ययागु जानकारी बियादीगु खः ।
स्वंगू दशकं मल्याक सांगीतिक ख्यलय् थःत पानादीम्ह सतिशं कला साधनाय् लगे जुयाः थ्व स्वयां न्ह्यःया याकः सांगीतिक ज्याझ्वः स्वयां थुगु ज्याझ्वः थःगु निंतिं चुनौतिपूर्ण जुयाच्वंगु खँ कनादीगु खः ।
समाजया नायः विजयलाल डंगोलं सतिश महर्जनया सांगीतिक योगदानया कदर यायेकथं याकः सांगीतिक ज्याझ्वः यायेत्यनागु पत्रकार सम्मेलनय् कनादिल । ज्याझ्वलय् सतिशयात न्यय्द्वः तका दांलिसें दोसल्ला न्ययेकाः हनेज्या नं याइगु जूगु दु ।
सांगीतिक ज्याझ्वलय् सतिशयात नांजाःपिं म्येँ हालामिपिं रत्नशोभा महर्जन, दीपा महर्जन, रीता महर्जन, सरिता शाही, राफेला महर्जन व एकता महर्जनं साथ बियादी ।
