येँ (नेवाः देय् दबू ) – बागमति प्रदेश सरकारया मुख्यमन्त्री किरण थापां थौं प्रदेशसभाय् विश्वासया मत काइगु जूगु दु । वंगु भदौ ४ गते मुख्यमन्त्री नियुक्त जुयादीम्ह मुख्यमन्त्री थापां थौं विश्वासया मत कायेगु तयारी यानादीगु खः । वय्कः नेपाली कम्युनिष्ट पार्टी, नेकपा एमाले व राष्ट्रिय प्रजातन्त्र पार्टीया संसदीय दलया नेतातय् समर्थनय् मुख्यमन्त्री नियुक्त जुयादीगु खः ।
राप्रपां मुख्यमन्त्री थापायात समर्थन याःगु धासें संसदीय दलया नेता उद्धव थापायात पार्टीं साधारण दुजः तकं मदइ कथ. कारबाही यायेधुंकूगु दुसा नियुक्ति जूपिं मन्त्रीया बारे छुं निर्णय धाःसा याःगु मदुनि । थौं विश्वासया मत काइगु ज्याझ्वलय् राप्रपां छु याइ धइगु अझ नं स्पष्ट जुयाच्वंगु मदु ।
राप्रपाया अध्यक्ष राजेन्द्र लिङ्देनं सरकारयात समर्थन याइपिं सांसदतय्त कारबाहीया ख्याच्वः बिउसां नं नियुक्त जुइधुंकूगु मन्त्रीतय् बारे निर्णय मयाःगु कारणं यानाः राप्रपा सरकारय् दुथ्याइगु सम्भावना दुगु खँ सूत्रं धाःगु दु । मेखे सांसद उद्धप थापायात कारबाही याःगु खँयात कयाः पार्टी दुने विवाद जुयाच्वंगु दु ।
थ्वहे झ्वलय् नेपाली कांग्रेसं बागमति प्रदेशसभा संसदीय दलं मुख्यमन्त्री थापाया पक्षय् मतदान मयायेत ह्विप जारी याःगु दु । कांग्रेसं म्हिगः ह्विप जारी यासें विश्वासया मत सम्बन्धी प्रस्तावया विपक्षय् मतदान यायेत थः सांसदतय्त ह्विप जारी याःगु खः ।
कांग्रेस बागमति प्रदेशसभा संसदीय दलया प्रमुख सचेतक पुकार महर्जनं जारी याःगु ह्विपय् प्रदेशसभाया बैठकय् अनिवार्य उपस्थित जुइगु, तटस्थ मच्वनेत व मुख्यमन्त्री थापां न्ह्यब्वःगु विश्वासया मत सम्बन्धी विपक्षय् मतादान यायेत प्रदेशसभा दुजःपिंत निर्देशन बिउगु खः ।
नेपाःया संविधानया धारा १६८ या उपधारा (४) तथा बागमति प्रदेशसभा नियमावली, २०७४ या नियम १४३ कथं मुख्यमन्त्री थापां प्रदेशसभाय् विश्वासया मत सन्बन्धी प्रस्ताव पेश याइगु कार्यसूची दुगुलिइ कांग्रेसं थः दुजःतय्त उगु हे कथं मतदान यायेत ह्विप जारी याःगु खः ।
बागमति सरकार नीस्वनेत ५३ सांसदया दःसा गाः । तर मुख्यमन्त्री थापां राप्रपाया १२, नेपाली कम्युनिष्ट पार्टीया २६ व नेकपा एमालेया २५ सहित मुक्कं ६३ म्ह सांसदया हस्ताक्षर सहित मुख्यमन्त्री नियुक्त जुयादीगु खः । थापायात वंगु बिहीवाः प्रदेश प्रमुख दिपकप्रसाद देवकोटां मुख्यमन्त्रीइ नियुक्ति याःगु खः ।
थ्वहे झ्वलय् लुम्बिनी प्रदेश सरकारया मन्त्रिमण्डल विस्तारयात कयाः सत्तारुढ दल नेकपा दुनेया विवाद पिहां वःगु दु । साविक नागरिक उन्मुक्ति पार्टी व नेकपा एकीकृत समाजवादीपाखें निर्वाचित सांसदतय्त दुमथ्याकूृसें साविक माओवादी केन्द्रपाखे जक स्वम्ह मन्त्री दयेकेगु तयारी यायेवं असन्तुष्टिि सार्वजनिक जूगु खः । नागरिक उन्मुक्ति पार्टी पाखें नेकपाय् दुहां वम्ह प्रदेशसभा दुजः राजकुमार चौधरीं पार्टी नेतृत्वपाखे मन्त्री सिफारिसयात कयाः असन्तुष्टि प्वंकादीगु खः । वय्कलं थःपिंत प्रदेशसभाय् विपक्षी दलया हैसियतय् तयेत माग नं यानादीगु दु ।
चौधरीं लुम्बिनी प्रदेशसभाय् बुझे याःगु पार्टी एकता व भावना अःखः माओवादी पृष्ठभूमिका सांसदतय्त जक मन्त्री नियुक्ति याःगु धासें थःत विपक्षी दलया हैसियत बीत माग याःगु खः ।
